Pyplyn vir grootmaatwater kom vir De Rust

Die konstruksie van ’n grootmaatwaterpyplyn vir De Rust in Oudtshoorn se munisipale gebied het begin.

Dit is vandeesweek deur die Oudtshoorn-munisipaliteit bekend gemaak.

Volgens die munisipaliteit is die grootmaatwatervoorsiening aan De Rust nie voldoende nie. Dit is onder meer omdat die watertoekenning vir die gebied uit die Huisrivier minder is as die gemiddelde verbruik en omdat die water se kwaliteit by tye swak is, veral ná ’n verwoestende brand in Desember 2016 in die opvangsgebied.