’n Monument ter ere van vrouevryheidsvegters in die apartheidsjare is Dinsdag naby Zeerust opgerig, terwyl dié dorp en die omliggende gebiede onder erge diensleweringsprobleme gebuk gaan.
Volgens Noordwes se provinsiale regering is die monument uit die nasionale lotery en die Mmabana-stigting befonds. Die provinsie se departement van sport, kuns en kultuur kon nie Woensdag sê hoeveel die monument gekos het nie.
Cornél Dreyer, DA-raadslid in die Ramotsere Moiloa-munisipaliteit wat die gebied bedien, sê geld is nie uit dié munisipaliteit se fondse gebruik om die monument op te rig nie. “Ons dink wel die provinsie kon die geld veel beter aangewend het om die voortdurende water- en rioolprobleme in ons gebied aan te pak. Die verval is oral: straatligte wat nie werk nie en slegte paaie. ’n Mens ry maar op wat oor is van die paaie.”
