Twee nieregeringsorganisasies het hulle Dinsdag tot die hooggeregshof in Pretoria gewend in ’n poging om die waterlisensie wat in 2016 aan die Indiese steenkoolmyngroep Uthaka Energy toegestaan is om steenkool in die Mabola-bewaringsgebied in Mpumalanga te ontgin tersyde te stel.
Die Trust vir Bedreigde Spesies (EWT) en die Federasie vir ’n Volhoubare Omgewing (FVO) wat deur die Sentrum vir Omgewingsregte (CER) verteenwoordig word, vra die hooggeregshof om die waterlisensie wat Nolwazi Gasa, destyds die waarnemende direkteur-generaal van water en sanitasie, aan Uthaka toegestaan het, nietig te verklaar.
Die departement van water en sanitasie skaar hom by Uthaka Energy (voorheen Atha Africa) en staan die EWT en die FVO in dié aansoek teen.
