Die Hoërskool Noordheuwel in Krugersdorp en die Hoërskool Zwartkop in Centurion is vandeesweek weens die koronavirus gesluit.
Noordheuwel het gister op sy Facebook-blad gesê die skool sluit tweede pouse omdat ’n leerling positief getoets is. Ouers is in ’n brief ingelig dat die leerling Woensdag by die skool was.
Dr. Dewald Strydom, hoof van die Hoërskool Zwartkop, het ouers Donderdag in ’n nuusbrief in kennis gestel dat ’n gesinslid van een van die matrikulante in kontak was met iemand wat besmet is. “Die gesin is getoets en een van die ouers en die matriekkind is positief getoets.”
