Só plaas ouers druk op openbare skole

Middelklasouers wat hul kinders weens ekonomiese druk uit private skole skuif, plaas ongekende druk op openbare skole wat die kinders moet akkommodeer.

Mathanzima Mweli, direkteur-generaal van basiese onderwys, sê hoewel al nege provinsies probleme in hierdie verband ondervind, word Gauteng en die Wes-Kaap die ergste geraak.

Dit het daartoe gelei dat daar teen 1 Februarie vanjaar 1 579 leerlinge in die Wes-Kaap in veral gr. 1 en gr. 8 was wat nog nie in laer- of hoërskole geplaas is nie.