Die Universiteit Stellenbosch (US) wil blykbaar vier van hul manskoshuise van volgende jaar vir vroue oopstel.
Onder die koshuise wat oorweeg word, is Dagbreek, een van die oudste en mees tradisieryke koshuise op Stellenbosch wat reeds in 1921 amptelik geopen is. Die ander is Huis Visser, Huis Marais en Helshoogte.
Die besluit om manskoshuise oop te stel en veral die manier waarop dit geneem is, het talle Stellenbossers warm onder die kraag. Hulle beskuldig die visekanselier, prof. Wim de Villiers, en die rektoraat van onderduimsheid en sê die besluit is op oneerlike en agterbakse wyse geneem sonder dat dit op die universiteitsraad bespreek is.
