Dr. Nkosazana Dlamini-Zuma, die minister wat die verkoop van drank en sigarette gedurende die Covid-ramptoestand verbied het, is die ANC se voorkeurkandidaat om die voortslepende elektrisiteitskrisis op te los.
Die ANC se nasionale uitvoerende komitee (NUK) het op sy lekgotla verlede naweek aanbeveel dat die 74-jarige Dlamini-Zuma in beheer geplaas word van die voorgenome ramptoestand wat die regering wil afkondig om die krisis by Eskom te takel.
Onberispelike regeringsbronne het egter hierdie week aan Rapport gesê daar is groot druk van binne pres. Cyril Ramaphosa se eie kabinet om die NUK se aanbeveling te ignoreer. Hulle wys daarop dat Dlamini-Zuma se besluite gedurende die Covid-ramptoestand nie net ongelooflik ongewild by kiesers was nie, maar ook dat sy Ramaphosa openlik vyandiggesind is. In Desember was sy een van vier ANC-LP’s wat ’n opdrag van die party verontagsaam het en saam met die opposisie in die parlement gestem het dat Ramaphosa wel in ’n staat van beskuldiging geplaas word weens die Phala Phala-skandaal. Sy het ook in haar veldtog om Ramaphosa as ANC-president te ontsetel – die tweede keer dat sy hom vir die pos uitdaag – die president van korrupsie beskuldig.
