Bheki Cele, minister van polisie, wat slaggate in Kaapstad die skuld gee vir die polisie se mislukking om kapings in die metro te keer, “maak net geraas”.
So sê Geordin Hill-Lewis, burgemeesterskandidaat van die DA in die Kaapstad-metro, nadat Cele Vrydag op ’n misdaad-imbizo in Mitchells Plain gesê het daar is ’n hoë aantal kapings in woonbuurte soos Langa en Khayelitsha omdat daar so baie slaggate is. Kapers weet dat motoriste stadiger daar moet ry en wag hulle dan in, volgens Cele.
Hill-Lewis sê terwyl Cele slaggate die skuld gee, is hy die “ANC-meesterbrein” agter die plan vir ’n enkele polisiediens om so die mag van die Kaapstad-metro weg te vat. Dit sal daartoe lei dat die metro se wetstoepassingseenheid na die Suid-Afrikaanse Polisiediens oorskuif en die metro nie sy eie prioriteite vir polisiëring kan bepaal nie.
