Altesame R1,4 miljoen vir die modernisering van ’n kombuis, R240 000 om van kakkerlakke ontslae te raak, R54 000 om ’n gordynreling te vervang en R50 miljoen om seker te maak dat ministers en hul adjunkte se kragopwekkers werk.
Hierdie transaksiebedrae is enkele van die sowat R93 miljoen wat die departement van openbare werke en infrastruktuur van 2019 tot 2022 bestee het om ministers, hul adjunkte en direkteurs-generaal se ampswonings in stand te hou, asook om vir hul munisipale dienste te betaal.
Sihle Zikalala, minister van openbare werke en infrastruktuur, het die bedrae bekend gemaak in ’n antwoord op ’n parlementêre vraag van dr. Leon Schreiber, DA-LP en partywoordvoerder oor openbare werke.
