Panyaza Lesufi, Gautengse premier, sê die DA moet ophou met bewerings dat hy as premier inmeng met die verkiesing van munisipale rade omdat hy raadsvergaderings slegs in sy hoedanigheid as Gautengse “voorsitter van die ANC” bywoon. Rapport het verlede week berig hoe Cilliers Brink, die DA se burgemeesterskandidaat in Tshwane, aan Lesufi geskryf het om hom te waarsku teen enige planne van die Gautengse regering om die Tshwane-metro onder administrasie te plaas.
Vrese het ontstaan dat die Gautengse regering by die Tshwane-metro kan ingryp nadat dr. Kgosi Maepa, raadgewer in Lesufi se kantoor, in ’n TV-onderhoud daarop gesinspeel het dat die onstabiliteit van die metroraad die provinsie met geen keuse kan laat nie.
Volgens Brink sou Lesufi dit nie kon doen nie omdat hy glo deels verantwoordelik is vir die onstabiliteit in die stad.
