Sommige LP’s voel in die gesig gevat en is bekommerd oor ’n uitlating deur ’n adjunkminister Dinsdag dat “wit Afrikaners die grootste plegers van haatmisdaad en haatspraak in Suid-Afrika is”.
LP’s van die VF Plus en DA het Woensdag beswaar gemaak teen dié uitlating van John Jeffery, adjunkminister van justisie, tydens ’n bespreking van die Wetsontwerp op die Voorkoming en Bestryding van Haatmisdade en Haatspraak.
Die DA het Jeffery daarvan beskuldig dat hy homself aan haatspraak skuldig maak en die parlement vir “goedkoop politiekery” misbruik.
