Die Maselspoort-voorval is ’n goeie voorbeeld van hoekom die Wetsontwerp op die Voorkoming en Bestryding van Haatmisdaad en Haatspraak “dringend nodig is”.
John Jeffery, adjunkminister van justisie en konstitusionele ontwikkeling, het Dinsdag so aan LP’s gesê toe die voorgestelde wetgewing in ’n sitting in die parlement bespreek is. “Ek dink daar is baie wat daar buite gebeur en hierdie wetgewing word dringend benodig. Ek hoop dit sal prioriteit geniet.”
Die drie mans wat aangekla word in verband met die beweerde rassevoorval by die Maselspoort-vakansieoord buite Bloemfontein op Kersdag het op 25 Januarie vir die eerste keer saam in die landdroshof in die stad verskyn. Die saak is tot 28 Februarie uitgestel.
