Onteiening sonder vergoeding bly steeds die grootste bedreiging vir die eiendomsreg van elke landsburger, waarsku Vrystaat Landbou (VL).
Volgens die president van VL, Francois Wilken, is dit belangrik dat landburgers en burgerlike organisasies nie die afwering van pogings om die Grondwet te wysig as die einde van die aanval op eiendomsreg moet sien nie.
“Anders as die wysiging van artikel 25 van die Grondwet stel die nuwe onteieningswetsontwerp van 2020 dit in die vooruitsig dat alle bates (nie net grond nie) onteien kan word. ’n Tweederdemeerderheid was vir die aanvaarding van die wetsontwerp vir die verandering van die Grondwet nodig. Daarteenoor is slegs ’n volstrekte meerderheid (50%+1) van stemme vir die onteieningswetsontwerp nodig,” sê VL in ’n verklaring.
