’n Onafhanklike entiteit of agentskap om veral sistemiese korrupsie in Suid-Afrika te beveg en uit te roei, word op nasionale vlak oorweeg.
Dit is omdat die land se huidige teenkorrupsie-argitektuur volgens Ronald Lamola, minister van justisie en korrektiewe dienste, verouderd is vergeleke met internasionale maatstawwe.
Die teenkorrupsie-entiteit “sal die hoogtepunt wees van navorsing en besprekings wat die afgelope twee jaar aan die gang is”, het hy Maandag gesê op ’n hibridiese konferensie oor die hervorming van die strafregstelsel ten einde korrupsie doeltreffender te kan bestry.
