Die voorbereidings vir die DA se leiersverkiesing, wat vandag in Midrand gehou word, het hierdie week in ’n morsige geveg van korrupsiebeskuldigings en prokureursbriewe ontaard.
Dr. Mpho Phalatse se veldtogbestuurder het ’n gerug versprei dat John Steenhuisen, leier, deur die DA se federale regskommissie ondersoek word.
Volgens Solomon Maile, Phalatse se veldtogbestuurder, se brief aan Helen Zille, voorsitter van die DA se federale raad, sou Steenhuisen persoonlik baat gevind het by geld wat ingesamel is by die Suid-Johannesburg-kiesafdeling. Maile wou onder meer van Zille bevestiging hê dat sulke klagte wel ondersoek word. Rapport verneem egter by betroubare bronne dat geen sulke ondersoek of klagte bestaan nie.
