Suid-Afrika se “wêreldberoemde” maatskaplike beskermingstelsel ondersteun nie net ekonomiese groei van grondvlak af nie, dit versterk ook maatskaplike solidariteit en stabiliteit in die land.
“Dit is een van die grootste prestasies van ons demokratiese samelewing en een waarop ons almal trots behoort te wees,” skryf pres. Cyril Ramaphosa Maandag in sy weeklikse nuusbrief.
Volgens hom verteenwoordig veral die R350-toelae – wat tydens die Covid-19-pandemie ingestel is vir werkloses en 11 miljoen begunstigdes tot dusver bereik het – ’n belangrike stap in sy administrasie se verbintenis om ’n minimum vlak van ondersteuning aan die mees kwesbare landsburgers te bied.
