Suid-Afrika wil gasheer wees vir vredesamesprekings tussen Rusland en Oekraïne in ’n poging om die oorlog tussen laasgenoemde lande te beëindig.
Die parlement het Saterdag in ’n verklaring bekend gemaak Suid-Afrika en die Verenigde Arabiese Emirate (VAE) het aangebied om gasheer te wees vir vredesamesprekings wat deur die Interparlementêre Unie (IPU) tussen Rusland en Oekraïne gefasiliteer word.
Dié aankondiging is vandeesweek deur Nosiviwe Mapisa-Nqakula, speaker van die Nasionale Vergadering (NV), in die 146ste sitting van die IPU in Manama, Bahrein, gedoen toe sy ’n verslag voorgelê het van die IPU se taakspan vir ’n vreedsame resolusie vir die oorlog.
