Hoewel opdrag gegee is dat die planne vir ’n borgskap van R1 miljard vir Tottenham Hotspur gestaak moet word, is meer as R500 000 van belastingbetalers se geld reeds daarmee heen.
Dié reusebedrag is bestee aan die reiskoste van raadslede van Suid-Afrikaanse Toerisme (SAT) wat vroeër vanjaar die planne met die Engelse sokkerklub gaan bespreek het, het Patricia de Lille, minister van toerisme, in ’n parlementêre antwoord aan Haseena Ismail, ’n DA-LP, gesê.
De Lille het Vrydag aangekondig dat sy die SAT-raad geadviseer het om die borgskap te staak. Volgens die regsadvies wat sy ingewin het, is die borgskap onwettig en ongeldig, het sy gesê.
