Terwyl SA Toerisme (SAT) swyg oor nuwe bewerings van moontlike ongerymdhede met sy borgskap van R1 miljard aan ’n Engelse sokkerklub, blyk pres. Cyril Ramaphosa teen so ’n ooreenkoms gekant te wees.
Vincent Magwenya, Ramaphosa se woordvoerder, het Vrydag gesê die presidensie het nog geen voorlegging ontvang oor die plan om die Tottenham Hotspur Football Club van die Engelse Premierliga te borg nie.
Ondanks bespiegelings het Magwenya aan Netwerk24 bevestig daar is geen plan om die borgskap in Ramaphosa se staatsrede volgende Donderdagaand aan te kondig nie.
