VL besorg oor burgery ondersoek word oor onrus

Vrystaat Landbou (VL) het sy kommer uitgespreek oor die polisie se “heksejag” op lede van die publiek wat hulself tydens die onrus in KwaZulu-Natal en Gauteng probeer beskerm het.

Volgens Francois Wilken, president van die VL, is Bheki Cele, minister van polisie, se onlangse uitsprake in die media kommerwekkend en teleurstellend.

“Cele het aangekondig dat die polisie se fokus rakende die onrus in KwaZulu-Natal en Gauteng geskuif het na strafregtelike ondersoeke na die sogenaamde burgery wat hulself in die onrus probeer beskerm het, eerder as om ondersoek in te stel waarom die polisie nie sy mandaat, soos vervat in die Grondwet en die Wet op die Suid-Afrikaanse Polisiediens (Wet 68 van 1995), kan nakom nie.”