As die wetsontwerp oor onteiening sonder vergoeding in die parlement aanvaar word, staan Vrystaat Landbou (VL) gereed om in samewerking met ander organisasies te help om ’n saak aan te pak as regverdige en billike vergoeding nie aan die grondeienaar betaal word nie.
So sê Francois Wilken, president van VL, nadat pres. Cyril Ramaphosa die naweek in Bloemfontein gesê het dat die ANC steeds onteiening sonder vergoeding najaag “omdat daar steeds grondhonger in die land is”.
Ramaphosa het dit duidelik gestel as deel van die 8 Januarie-verklaring ter viering van die ANC se 111de verjaardag dat “die ANC vasberade bly in sy verbintenis tot billike toegang tot grond om apartheidstoeëiening om te keer”.
