Dr. Blade Nzimande, minister van hoër onderrig, wetenskap en tegnologie, het Vrydag die bekendstelling van ’n 3D-drukker wat ’n huis binne agt uur kan bou, by die Universiteit van Johannesburg (UJ) bygewoon.
Die projek is ’n gesamentlike inisiatief van Nzimande se departement en die universiteit se fakulteit ingenieurswese en is daarop gemik om die agterstand met laekostebehuising op te los.
Die 3D-drukker gebruik ’n spesifieke soort sement wat vinniger droog word as gewone sement wat in die boubedryf gebruik word. Die masjien kan bykans enige struktuur druk. Vir enige bykomende elemente, soos ’n bank of pot vir die tuin, word die ontwerp eenvoudig in die masjien gelaai wat dit dan uit die sement druk.
