Terugskouend het almal perfekte sig. So weet elkeen vandag wat Orania moes gedoen het om die tragedie van Poppie van der Merwe te voorkom. Mense dink hulle weet sekere goed, wat gewoon nie so is nie. Orania is klein, maar elkeen weet nie wat in elke huis aangaan nie. Uiteraard hanteer professionele persone gesinsgeweld vertroulik. Om dit te kompliseer, het Orania ’n bevolkingsdeel wat nie lank bly nie. Mense daag met die mees basiese besittings op, sommige bly en word gewaardeerde inwoners, terwyl ander vertrek voordat iemand hulle nog kon leer ken. Party het ernstige trauma beleef, huishoudelik of andersins. Die Koekemoers was nie lank in Orania nie en van hulle vorige lewens weet ek niks.
Hierdie werklikheid stel geweldige eise aan ’n klein gemeenskap soos Orania. In baie gevalle is hulp van owerheidsweë afwesig of stadig.
Uit geld wat ons self insamel probeer ons dié uitdaging die hoof bied. Maatskaplike hulp wat in veel groter dorpe afwesig is, word in Orania gebied – normaalweg deur mense wat ’n breukdeel van die gangbare vergoeding ontvang. Om binne die wet op te tree, is vir Orania se instellings belangrik. Daarom word daar soms frustrerend stadig beweeg.
