Terugkeer op VIA (DStv-kanaal 147) se tweede seisoen is hier met nog grootwordstories van ons land se gunsteling-bekendes.
In die eerste episode keer die Springbok-rugbyspeler Pieter-Steph du Toit terug na sy wortels en wys hy ons die plaas Kloovenburg in Riebeek-Kasteel, waar hy grootgeword het. Hy deel sy grootste onthou-oomblikke uit sy grootwordjare en geniet dan ’n feesmaal saam met sy familie by ’n plaaslike restaurant, Bay Leaf & Thyme.
Pieter-Steph is die oudste van vier broers. Hy woon nou in die Paarl saam met sy vrou, Willemien du Toit, en hul tweejarige seuntjie, Pieter. En gelukkig vir hom wat so lief is vir sy familie en die plaas, is dit net ’n 40-minute-rit van die Paarl af, dan is hy by Kloovenburg.
