Die Mzansi Nasionale Filharmoniese Orkes (Msanzi NFO) wat deur Marin Alsop begelei word, pak sy eerste nasionale toer in Suid-Afrika aan.
Die toer begin op 15 Desember en sal Beethoven se Simfonie no. 9 tesame met bekwame soliste en plaaslike kore uitvoer aan diverse gemeenskappe oor die hele land.
Die orkes het meesterlike musikante byeengebring om hierdie meesterstuk uit te voer.
Die klassieke musiek-superster, Marin Alsop, is een van die voorste dirigente van haar generasie, en die orkes se konsertmeester, Suid-Afrikaanse violis Pieter Schoeman, is ook die konsertmeester van die Londense Filharmoniese Orkes.
Die soliste sluit in befaamde Suid-Afrikaanse mezzo-sopraan Michelle Breedt wat al in gesogte konsertsale oor die hele wêreld opgetree het.
Die talentvolle basbariton Msimelelo Mbali maak naam in Europa se operawêreld en sal ook by die Engelse Nasionale Opera aansluit in die 2022/23-seisoen. Bali het gegradueer aan die Lindemann Young Artist Development Program by die Metropolitan Opera.
Nadat hy in 2018 die Barokprys by die Voices of South Africa Internasionale Operasangkompetisie verower het, is hy genooi om ’n rol te vertolk in die English National Operas se uitvoering van Porgy en Bess.
Na afloop van sy sukses in Brittanje, is hy gevra om by die National Opera Studio aan te sluit vir die 2019/20-seisoen.
In 2021/22 het Msimelelo sy Metropolitan Opera-debuut gemaak as The Undertaker in Porgy and Bess en Third Vlamish Deputy in Don Carlos.
Dinamiese plaaslike kore soos die Gauteng Choristers, Tshwane Universiteit van Tegnologie-koor, Mzansi-koor en die Nuwe Apostoliese Kerkkoor tree ook tydens die toer op.
Die toer vind plaas op 15 Desember by die Linder-ouditorium in Johannesburg, 17 Desember by The Playhouse in Durban en 21 Desember by die Kaapstadse Stadsaal.
Bongani Tembe, uitvoerende hoof en kunsdirekteur van die Mzansi Nasionale Filharmoniese Orkes, sê: “Deur ons uiteenlopende en inklusiewe programme is die Mzansi Nasionale Filharmoniese Orkes daartoe verbind om lewens te transformeer en mense bymekaar te bring deur die krag van musiek.
"Om uitstekende Suid-Afrikaanse musikante onder leiding van ’n legendariese dirigent soos Marin Alsop bymekaar te bring, is ’n groot eer.”
Tembe voeg by hy het geen twyfel dat mense wat in aanraking kom met hul werk die hoë gehalte, lewenskragtigheid en toewyding waarvoor die Mzansi NFP bekend wil staan, sal ervaar.
Dirigent Marin Alsop sien uit daarna om die orkes te begelei tydens hierdie toer vanjaar en sê: “Ek het die voorreg gehad om reg oor die wêreld op te tree, maar om in ’n drie-stede-toer deur Suid-Afrika op te tree is vir my ’n eerste. Ek kan nie meer opgewonde wees nie.
“Ek is mal oor wat die Mzansi Nasionale Filharmoniese Orkes doen, nie net in hul land nie, maar ook elders. Musiek en die kunste het ’n unieke manier om die samelewing te verhef, en ek waardeer hoe hierdie orkes nie net daarop ingestel is om die hoogste musikale doelwitte te bereik nie, maar ook hul verantwoordelikheid teenoor die gemeenskap ernstig opneem.”
Alsop voeg by dat Beethoven se Negende Simfonie gespeel sal word soos jy dit nog nooit voorheen gehoor het nie.
“Die temas is universeel - gekenmerk deur verdraagsaamheid, eenheid en vreugde - wat ooreenstem met die ideale van Nelson Mandela en die konsep van ubuntu."
Sy word internasionaal erken vir haar innoverende benadering tot programbestuur en gehoorontwikkeling, diepgaande toewyding tot opvoeding en die bevordering van musiek se belangrikheid in die wêreld.
Die eerste vrou wat as hoof van ’n groot orkes in Amerika, Suid-Amerika, Oostenryk en Brittanje gedien het.
Pieter Schoeman, die orkes se konsertmeester is verheug om Suid-Afrika se beste en diverse orkesmusikante te lei in die Mzansi NFO se eerste nasionale toer tot nog toe in Suid-Afrika.
“Ek kon nie vir ’n beter tuiskoms vra as Beethoven se Negende Simfonie nie – dit beloof om die soort konsert te wees waaroor ons nog vir baie jare sal praat.”
Die Mzansi NFO is vroeër vanjaar amptelik bekendgestel as deel van ’n inisiatief van die Suid-Afrikaanse nasionale departement van sport, kuns en kultuur, ten einde die orkeservaring van die land te verbreed, die orkessektor te transformeer en om Suid-Afrika se beeld oor die hele wêreld positief te bemark.
Sy missie sluit die finansiering van streek- en jeugorkeste in, en die artistieke beplanningskomitee is besig om die finansieringsproses te finaliseer, met ontvangers wat voor die einde van die jaar aangekondig sal word.
Onder die orkes se vernaamste inisiatiewe is die ondersteuning van jong, opkomende musikante, wat plaaslik en/of internasionaal studeer, asook om uit te reik na provinsies wat nie hul eie professionele orkeste het nie.
’n Doelwit van die orkes is om saam met Suid-Afrikaanse kunstenaars te werk wat vir hulself naam gemaak het op die internasionale verhoog sodat hulle terugkeer om terug te gee aan hul tuisland.
Justice Leona Theron, voorsitter van die direksie van Mzansi Nasionale Filharmonies Orkes, sê: “Ná maande se beplanning is ons verheug dat die Mzansi Filharmoniese Orkes se eerste nasionale toer uiteindelik op hande is.
Ons is opgewonde om ons vriende te verwelkom om die verhoog met ons te deel terwyl ons ’n nuwe era betree. Terwyl ons saam hierdie nuwe vaandel lig, het ek geen twyfel dat ons ’n vlak van uitnemendheid, kunstenaarskap en inklusiwiteit sal ervaar wat ons nog net voorheen gesien het nie.”
Konserte in Johannesburg en Kaapstad is uitverkoop, maar daar is nog kaartjies vir Durban oor.
Kaartjies vir die konserte is op Quicket beskikbaar.
Vir navrae, kontak info@mzansiphilharmonic.org.za
