Té hoë salarisverhogings vir staatsamptenare – een van die grootste risiko’s wat in die 2023-begrotingsrede vir die staat se begroting geïdentifiseer is – “het nou gematerialiseer”, sê die tesourie.
In ’n verklaring sê die tesourie die gemiddelde verhoging van 7,5% aan staatsamptenare waarop Vrydag ooreengekom is, gaan die staatskas vanjaar R37,4 miljard méér kos. Dit beteken die staat se begrote salarisrekening vir die boekjaar tot Maart 2024 styg van R701,2 miljard tot R738,6 miljard.
In die daaropvolgende jare gaan die koste veel meer wees aangesien die nuwe salarisse uiteraard die grondslag vir volgende verhogings word.
