Al hoe meer stemme begin opklink dat ’n wêreldresessie dreig as uitvloeisel van die uiters hoë inflasie en die skerp styging in rentekoerse wêreldwyd.
Lawrence Summers, ’n voormalige Amerikaanse minister van finansies, het in ’n program op Bloomberg Television gesê mense is tereg bekommerd. “Soos toe mense in Augustus 2007 angstig geraak het, dink ek daar behoort ook op die oomblik verhoogde angstigheid te wees.”
Sy opmerking is met verwysing na die finansiële krisis wat tot die Groot Resessie van 2007-’08 gelei het, waardeur meer as $2 000 miljard in die wêreldekonomie uitgewis is. Dit was een van die vyf vernietigendste finansiële krisisse tot nog toe, het Encyclopedia Brittanica in 2020 bevind.
