Kaapse hawe: Met dié planne sal wagtyd krimp

Rolspelers in die Kaapse hawe werk hard om die opeenhopings en vertragings op te los wat onder meer wyn- en vrugte-uitvoer belemmer.

Transnet het belowe dat vragskepe teen einde Maart of begin April ’n vasmeerplek sal kry sodra hulle by die Tafelbaaise hawe aankom.

Dis teenoor die huidige situasie waar daar ses skepe buite die hawe wag vir vasmeerplek en die gemiddelde wagtyd vir ’n vasmeerplek tot ses dae kan duur, volgens Terry Gale, voorsitter van die Uitvoerdersklub van die Wes-Kaap.