Die rand het die afgelope ses dae versterk nadat die geldeenheid sy swakste punt van R18,42 in die afgelope jaar vroeg in November behaal het.
“Die rand het veral die afgelope twee dae, ná vyf maande in die wildernis, baie van sy verlore grond herwin,” sê Nicky Weimar, ekonoom van Nedbank, in ’n ontleding.
“Die herstel is meegebring deur die laer as verwagte Amerikaanse inflasiesyfer vir Oktober, wat die siening versterk het dat die rentekoerse daar nie veel verder of vir veel langer gaan styg om die inflasieteiken tot 2% terug te bring nie. Gevolglik het risiko-aptyt herstel, die dollar het verswak, en die rand en geldeenhede van ander ontluikende markte se ekonomieë het versterk.”
