Sakelui van Frankfort in die Vrystaat en hul kragverspreider sal die komende week in die hooggeregshof in Johannesburg baklei vir die reg om so min moontlik beurtkrag te kry omdat hulle genoeg sonkrag opwek om dit te kan vermy.
Eskom dreig egter om die toepassing van beurtkrag uit die hande van Rural Maintenance te neem wat kragverspreiding namens die plaaslike Mafube-munisipaliteit behartig.
Dít sal beteken dat inwoners beurtkrag kry terwyl daar eintlik genoeg krag beskikbaar is vanweë die alternatiewe kragbron. Ook aanpassings wat Rural Maintenance in die beurtkragrooster gemaak het sodat waterpompe en rioolwerke kan funksioneer, kan iets van die verlede wees.
