Fase 5-beurtkrag terug nadat 5 eenhede skielik onklaar raak

Slegs twee uur voor die tyd het Eskom Maandag aangekondig dat fase 5-beurtkrag weer eens vanaf 16:00 sal geld.

Die nutsmaatskappy sê in ’n betreklik kort kennisgewing dat hy genoop is om hierdie besluit te neem nadat altesaam vyf opwekkingseenhede skielik gelyk onklaar geraak het.

Met ’n gemiddelde steenkoolkragstasie se opwekkingseenheid wat sowat 400 MW tot 500 MW opwek, het daar dus skielik ’n tekort van minstens 2 000 MW ontstaan deur dié foute.