Vilko: Goue eeu van saamstaan gevier

Die feesklokke op Villiersdorp het vandeesmaand behoorlik gelui ter viering van die Villiersdorp-koöperasie (Vilko) se 100ste bestaansjaar.

Dié koöperasie het sy ontstaan in 1922 waar dit formeel op 28 Februarie gestig, maar eers op 8 April amptelik geopen is.

Daar was in daardie stadium reeds ’n aktiewe landboubedryf op die dorp, maar dit was ongeorganiseerd. ’n Groep plaaslike boere het egter in 1920 die pioniersbesluit geneem om ’n boerevereniging te stig wat uiteindelik aanleiding gegee het tot die ontstaan van die koöperasie op dié landboudorp.

Dit het in sy beginjare as die Villiersdorp Moskonfyt- en Vrugtekoöperasie bekend gestaan. Die koöperasie bedien vandag vrugteboere wat al langs die waterskemas in onder meer Villiersdorp, Vyeboom, Greyton en Ceres boer.

Vilko se 100ste bestaansjaarvieringe het op 8 April vanjaar ’n hoogtepunt bereik met ’n spoggerige galageleentheid vir genooide gaste in die Mosko-stoor agter die alombekende Kelkiewyn-restaurant op die dorp.

Die landbou-ekonoom prof. Johan Willemse was die gasspreker gewees.

Timo le Roux, Vilko se voorsitter, het op die galageleentheid gesê dat die koöperasie se sukses op vier pilare staan, naamlik: mense, infrastruktuur en geboue, wiele, sowel as goeie finansiële bestuur.

Hy was vol lof vir die koöperasiepersoneel en die goeie werk wat hulle doen – ondanks die uitdagings wat hulle daagliks in die gesig staar. “As ek van mense praat, verwys ek spesifiek na die personeel – van die persoon wat onder by die rak werk tot bo by Ben Klindt, die hoofbestuurder. Julle doen goeie werk.”

Volgens Le Roux kan ’n suksesvolle koöperasie slegs bestaan as dit op die sterk beginsels staangemaak word. Dít sluit in ekonomiese deelname deur die koöperasie se lede en die skep van ’n selfstandige en onafhanklike onderneming. Dan moet daar ook samewerking tussen belanghebbendes wees, sowel as demokratiese beheer.

Die laaste beginsel is vrywillige lidmaatskap.

“Die voordele van ’n koöperasie as ondernemingsvorm is dat dit geleenthede skep vir mense om saam te werk vir ’n gemeenskaplike doel. Die koöperasie mik daarom om hul gemeenskap of lede te bevoordeel, en grootmaataankope stel koöperasies ook in staat om soms beter pryse van die verskaffers te onderhandel,” het hy gesê.

Daarbenewens bied koöperasies ook goedere teen ’n bekostigbare prys aan die gemeenskap omdat dit nie noodwendig winsgedrewe is nie. “Mag ons die toekoms met soveel ywer as ons voorgangers aanpak,” het Le Roux gesê.

Dr. Pietie le Roux, wat vir 30 jaar op Vilko se direksie gedien het, en sy vrou, Sarie, by die galageleentheid.

Oom Daniel Roux, die oudste lewende voorsitter van Vilko, en sy vrou, Alida, het ook die galageleentheid bygewoon.

’n Spesiale boek wat meer vertel oor Vilko se geskiedenis oor die afgelope jare sedert die koöperasie se ontstaan in 1922, sowel as ’n eeufees-wyn is op die galageleentheid bekend gestel. Die gaste kon ook elkeen ’n eksemplaar huis toe neem.

Die Mosko-stoor agter die Kelkiewyn-restaurant het omtrent spoggerig gelyk gedurende die galageleentheid.