Die boustene wat Afrimat Hemp by sy aanleg in Worcester vervaardig, lyk dalk soos ’n doodgewone baksteen, maar dit is byna drie keer ligter. Dit is alles te danke aan die feit dat hennep gebruik is as opvulling binne-in die bakstene pleks van beton.
Afrimat Hemp het in 2021 tot stand gekom as ’n filiaal van die oopgroefmyn- en konstruksiegroep Afrimat. Boustene wat hennep as ’n opvulling gebruik, staan bekend as hempcrete – ’n mengsel van hennep en geformuleerde kalk wat dan saamgepers word in blokke.
Afrimat Hemp se boustene van hempcrete is onlangs gebruik in ’n hotel in Harringtonstraat, Kaapstad, wat in aanbou is.
