Suid-Afrikaanse modeontwerpers hoef nie terug te staan vir hul oorsese eweknieë wat omgewingsvriendelike klere betref nie, sê Lucilla Booyzen, stigter van SA Modeweek.
“In 2019 het SA Modeweek besluit op ’n vyfjaarplan om teen 2025 ’n volledige ekologies-gebaseerde en volhoubare plaaslike bedryf te vestig.”
Samewerkingsooreenkomste met kleinsakeondernemings (KMO’s) en byvoorbeeld die sybokhaarbedryf het daartoe gelei dat ontwerpers wat aan SA Modeweek deelneem lap gebruik wat die minste moontlike impak op die omgewing het. “Hulle gebruik natuurlike linne en katoen wat volhoubaar verbou is. Klerereekse is pels- en leervry en baie klere is gemaak uit herwinde of hergebruikte lap,” sê Booyzen.
