Shoprite laat rekords spat met dividend, markaandeel

’n Rekordjaar vir die Shoprite-groep wat tot ’n rekord-markaandeel en -dividend gelei het. So het Pieter Engelbrecht, uitvoerende hoof van die groep, Dinsdag aan beleggers oor die groep se resultate gesê.

Hy het ook die sluier gelig oor groeiplanne in die lopende boekjaar met ’n rekordgetal winkels wat geopen gaan word, uitgesluit winkels wat by Massmart gekoop is.

Die inkomste het in die pas afgelope boekjaar wat tot die eerste week in Julie geduur het, met 9,6% tot R184,1 miljard gestyg.