Hardik Pandya, Indië se instaan-kaptein, is glad nie in sy noppies met die blaaie wat tot dusver vir hulle opgedis is in dié span se T20-tuisreeks teen Nieu-Seeland nie en hoop die kolfstrook vir Woensdag se beslissende derde stryd sal veel beter wees.
Pandya en sy Nieu-Seelandse eweknie was verbaas oor die skerp draai wat daar in die openingswedstryd in Ranchi was. Die Kiwi’s het dié stryd met 21 lopies gewen.
In Sondag se tweede kragmeting in Lucknow het die draaiers selfs nog meer oorheers. Nieu-Seeland kon net 99/8 aanteken, maar Indië moes spook vir ’n oorwinning en het die wenlopies eers van die voorlaaste bal af aangeteken.
