Met die huidige toestande op Senwespark wat drasties verskil van dié wat tradisioneel in Potchefstroom aangetref word, gaan die Lions hul spel voor hul eerste wedstryd in die plaaslike eendag-krieketreeks noodgedwonge moet aanpas.
Die Johannesburgers pak die Cape Cobras Vrydag in die eerste wedstryd van Groep B se kragmetings, wat in ’n bioborrel in Potchefstroom beslis word.
Die kolfblaaie op dié veld was deur die jare van die bestes om op te kolf in Suid-Afrika, maar dit was duidelik in die wedstryde van Groep A vroeër vandeesmaand dat die bal weens al die eendeweer in dié streek baie stadiger deurskiet.
