Max Verstappen het met sy terugkeer na Red Bull se fabriek in Milton Keynes, Engeland, Woensdag erken dat hy “baie gelukkig” was om verlede Sondag se Abu Dhabi Grand Prix te wen, maar glo dat hy dit verdien het nadat die geluksgodin vroeër in die Formule Een-seisoen nie aan sy kant was nie.
“Mense sê dit was ’n gelukkige oorwinning en dit wás absoluut baie gelukkig, maar vroeër in die seisoen was die geluk dikwels nie aan ons kant nie. Met ’n bietjie meer geluk vir ons sou die kampioenskap al voor Sondag beslis gewees het, al het Mercedes in die pylvak van die seisoen sterker geraak. Soms is dit lekker om ook die geluk ’n slag aan jou kant te hê,” het Verstappen luidens ’n berig deur die Daily Telegraph gesê.
Lewis Hamilton was Sondag met vyf rondtes oor 11 sekondes voor Verstappen en goed in sy Mercedes op pad om ’n agtste wêreldtitel te wen. Verstappen kon hom egter inhaal ná die ontplooiing van die veiligheidsmotor en het hom met vars bande in die laaste rondte verbygesteek.
