Max Verstappen (Red Bull), die verdedigende Formule Een-wêreldkampioen, is vol lof vir die Duitse renjaer Mick Schumacher omdat hy kopgehou het in die doodsnikke van die Britse Grand Prix.
Verstappen (24) het Sondag effens teen die verwagting in dit teen Schumacher (Haas) uitgespook vir die sewende plek op Silverstone. Dit was nadat Verstappen se motor vroeër in die wedren skade opgedoen het.
Dit was ’n behoorlike katgeveg tussen die twee, met Verstappen wat toe sewende geëindig het. Schumacher (23) se agtste plek het beteken dat die Duitser die eerste keer in sy loopbaan as F1-renjaer kampioenskapspunte ingesamel het.
