Jimmy Stonehouse, afrigter van die Pumas, erken sy senuwees het Vrydagaand effens geknaag toe dit lyk of sy span ’n sege oor die Leeus in die spanne se Curriebeker-rugbywedstryd in Mbombela weggesmyt het.
Die tuisspan het – danksy ’n drie deur die senter Diego Appollis in die doodsnikke – met 34-27 gewen. Teen rustyd was die Pumas stewig in beheer van die wedstryd, met die telling wat 17-3 in hul guns was.
“Toe ons in die tweede helfte uitkom en ons word dadelik gestraf vir foute wat ons maak, toe is ons effens op die agtervoet,” het Stonehouse ná die wedstryd op ’n nuuskonferensie gesê.
