Die Leeus het die Haaie Saterdag verbygesteek op die Premierliga-puntelys, deur die Durbaniete met 34-22 te verslaan in ’n klipharde Curriebeker-wedstryd op Ellispark in Johannesburg.
Die eerste kwartier is gekenmerk deur doellose skoppery aan albei kante, maar die wedstryd het kort daarna behoorlik vlamgevat toe die tuisspan se heelagter, Tiaan Swanepoel, die eerste drie gaan druk het ná goeie aanvallende werk deur sy agtsteman, Jarod Cairns.
Die Haaie het hulself daarna teruggespeel in die wedstryd, met drieë deur Fez Mbatha (haker) en Thembelani Bholi (agtsteman) wat aan die besoekers ’n rustydvoorsprong van 12-5 besorg het.
