In die Haaie-rugbykamp was dit ’n week van tragedie en verwoesting, maar ook een waartydens verskeie spelers as helde in hul gemeenskap na vore getree het.
Nie net het die vloede in KwaZulu-Natal chaos op Kingspark en in die spelers se huise veroorsaak nie, maar die spanbestuurder, Trevor Barnes, se skoonseun is ook Dinsdag oorlede nadat hy in Pietermaritzburg van ’n drieverdiepinggebou se dak geval het.
Volgens die Haaie se uitvoerende hoof, Eduard Coetzee, was Kyle Mastross (34) besig om dakteëls te herstel toe hy geval het. Hy word deur sy vrou, Tatum, en tweejarige seun, Noah, oorleef.
