’n Begeesterde Lyon het Vrydagaand hulself min aan die rekordboeke en statistieke gesteur deur vir Toulon in Marseille voor ’n volgepakte stadion te skok in die eindstryd van die Europese Uitdaagbeker.
Lyon, wat vir die heel eerste keer in die klub se bestaan ’n Europese eindstryd gehaal het, het ’n ongedissiplineerde Toulon se tjank met 30-12 afgetrap.
Nie net was dit ’n eerste keer wat Lyon die soete smaak van beker-glorie in dié reeks geproe het nie, maar dit was ook die eerste keer wat hy vir Toulon kon ore aansit in die Uitdaagbeker.
