’n Kleedkamer wat meer soos ’n beeskraal lyk. Speletjies tydens salaris-onderhandelinge. Inmenging vanuit die uitvoerende hoof se kantoor by spankeuses en wedstrydplanne. En gebrekkige kommunikasie van die bestuur.
Dít, het ’n onberispelike bron die afgelope week aan Rapport gesê, is maar net ’n paar van die dinge wat krap aan afrigters by die Leeus-rugbyunie, waar ’n nuwe storm die afgelope week deur ’n plofbare berig op die rugby-webblad Rugby365 ontketen is.
Luidens die berig, onder die hoofopskrif Mutiny in the Den?, het ’n paar van die unie se afrigters onlangs op ’n vergadering die opsie bespreek om Rudolf Straeuli, die Leeus se uitvoerende hoof en direkteur van rugby, te konfronteer met hul griewe oor ’n aantal kwessies rondom sy bestuurstyl. In die berig word ook ongelukkigheid gemeld oor die manier waarop Tracy van Ginkel, hoof van kontrakte, haar werk doen.
