In baie uithoeke van die rugbywêreld word geglo dat daar nie ’n beter steelkantflank as Pieter-Steph du Toit is nie, maar dis onwaarskynlik dat hy die Stormers se voorkeurspeler in daardie posisie sal wees.
Dis nou indien hy na Suid-Afrika terugkeer, soos die afgelope Sondag deur Rapport bespiegel is. Die Stormers is as ’n moontlike bestemming genoem.
Maar hokaai, wag ’n bietjie . . . die Stormers het mos vir Hacjivah Dayimani. En waarom sal hulle ’n speler wat die spilpunt van hul aanvallende plan is wil inboet, al is dit vir een van die wêreld se beste spelers?
