Die Suid-Afrikaanse Rugbyunie (Saru) het in September verlede jaar, kort nadat onthullings oor die beweerde verhouding tussen die Springbok-losskakel Elton Jantjies en die span se dieetkundige, Zeenat Simjee, gemaak is, begin werk aan ’n beleid oor “romantiese en seksuele verhoudings in die werkplek”.
Hoewel Saru aanvanklik gesê het dat Jantjies-hulle geen protokol oortree het nie, het die nasionale beheerliggaam nie gras onder sy voete laat groei om die kwessie aan te spreek nie.
Die beleidsdokument is in Desember voltooi en aan alle Saru-werknemers, insluitend spelers, uitgereik. Spelers wat by oorsese klubs gekontrakteer is en vir die Springbokke kom speel, is ook onderhewig daaraan.
