Die Cheetahs se vlugvoetige vleuel Rosko Specman is beslis deel van die Blitsbokke se planne vir die 2021 Olimpiese en hy kan hom dalk reeds vroeg in Maart in Stellenbosch by die nasionale sewesspan aanmeld.
Nadat die Vrystaat-Cheetahs uit die Pro14-reeks geskop is, is Neil Powell, afrigter van die Blitse, gevra of daar spelers in Bloemfontein is in wie hy moontlik belangstel.
Met die Curriebeker wat in Januarie eindig en die uitgebreide Pro-reeks wat na verwagting in Maart begin, kan dit beteken dat van die Cheetahs se beste spelers nie in ’n topreeks in aksie gaan wees nie. Daar is wel planne dat ’n SA Beker-kompetisie, tussen al die land se provinsiale spanne, in Februarie begin.
