Die Bok-kaptein Siya Kolisi het dit sterk oorweeg om nou reeds te besluit om ná vanjaar se Wêreldbeker-toernooi in Frankryk uit internasionale rugby te tree.
Trouens, daar was selfs sprake van ’n klousule in sy kontrak met die Franse span Racing 92 wat hom sou verbied om verder vir die Bokke te speel, het Rapport by verskeie bronne verneem. Dit blyk egter dat dié klousule dit nie tot in sy finale kontrak gemaak het nie. Die geelwortel om moontlik ná die Wêreldbeker-toernooi voort te speel en by die 100-toets-mylpaal uit te kom, het, na verneem word, ’n groot rol in Kolisi se besluit gespeel om nie nou al ’n besluit oor sy loopbaan te neem nie.
Dit beteken egter nie die 31-jarige Bok-kaptein se voortgesette toetsloopbaan ná 2023 is ’n gegewe nie. Volgens Rapport se inligting sal hy ná die skouspel in Frankryk eers ’n finale besluit neem. As hy besluit om nog nie uit te tree nie, bestaan daar ook ’n groot moontlikheid dat hy afstand kan doen van die kapteinskap.
