Nico Luus, afrigter van Tuks se beleërde Varsitybekerspan, is volgens die Universiteit van Pretoria nie afgedank nie.
Steven Ball, Tuks se sporthoof, het Sondagoggend by navraag aan Netwerk24 ontken dat Luus die trekpas gekry het. Ball is om kommentaar genader nadat gerugte sedert laat Saterdagaand die ronde begin doen het dat Luus se dienste beëindig is.
Luus is in die spervuur omdat Tuks aan die einde van die huidige Varsitybeker-seisoen na die Skildreeks, die tweede liga, gerelegeer word. Dit is omdat die Pretorianers – met een ronde rondomtalie-wedstryde oor – onderaan die reeks se puntelys is. Dit is nie meer moontlik vir Tuks, wat ses nederlae op ’n streep gely het, om nie die seisoen in die laaste plek op die puntelys af te sluit nie.
