Rohan Janse van Rensburg en Lukhanyo Am kan ’n “dodelike kombinasie” by die Haaie vorm, glo die gewese Springbok-hulpafrigter Swys de Bruin.
Rapport het die afgelope naweek berig die Haaie is op die spoor van Janse van Rensburg, wat tans vir die Sale Sharks in Engeland speel. Min mense ken dié bieliesenter so goed soos De Bruin, wat hom lank by die Leeus afgerig het.
“Verskeie dinge maak hom goed; hy is een van my gunsteling-senters wat ek tot dusver afgerig het. Hy is ’n totale spanman en ek het gedink hy sou teen dié tyd al gereelder vir die Springbokke gespeel het,” sê De Bruin aan Netwerk24.
